Job 22

Impendulo ka-Elifazi

1 U-Elifazi umThemani wasephendula wathi:

2 “Umuntu angasiza uNkulunkulu na? Lesihlakaniphi uqobo kambe singamsiza na?

3 Bekungamupha ntokozo bani uSomandla ukulunga kwakho na? Ubengazuzani ngabe kuthiwa kawulasiyinga na?

4 “Yikulunga kwakho yini akukhuzela khona akwethesela khona amacala na?

5 Kabubukhulu ububi bakho na? Lezono zakho angithi kazipheli na?

6 Wawubiza isibambiso kubafowenu kungelasizatho; uhlubula abantu izigqoko zabo basale beze.

7 Abakhatheleyo wawubancitsha amanzi, abalambileyo ungabaphi ukudla,

8 lokuba wena wawuyindoda elamandla ulepulazi – indoda ehlonitshwayo, uphila kulo.

9 Abafelokazi wabaxotsha ungabaphanga lutho izintandane waziqeda amandla.

10 Kungenxa yalokho usuhanqwe yimijibila, usuhlukuluzwa luhlupho masinyane,

11 yikho kumnyama kangaka ungasaboni, njalo yikho ususibekelwa yizimpophoma zamanzi.

12 “UNkulunkulu kakho esiqongweni samazulu na? Ake ubone phela ukuthi ziphakeme njani izinkanyezi ezisesiqongweni!

13 Kodwa wena uthi, ‘UNkulunkulu wazini? Angehlulela phakathi komnyama onje?

14 Usithwe ngamayezi amakhulu, ngakho kasiboni nxa ehambahamba ezulwini eliphezulu.’

15 Wena-ke uzakwalela endleleni endala na eseyahanjwa yizigangi?

16 Bedluliswa singakafiki isikhathi sabo, izisekelo zabo zakhukhulwa nguzamcolo.

17 Bathi kuNkulunkulu, ‘Tshiyana lathi! USomandla angasenzani na?’

18 Ikanti kunguye owagcwalisa izindlu zabo ngezinto ezinhle, ngakho kangingeni ezelulekweni zababi.

19 “Abalungileyo bayakubona lokho bathokoze; abangelacala bayabahleka bathi,

20 ‘Ngempela izitha zethu zichithiwe, lokuseleyo kwenotho yazo sekubhuqwe ngumlilo.’

21 “Zilethe kuNkulunkulu ukuze uwelelane laye; ngaleyondlela ukuphumelela kuzakuza kuwe.

22 Yamukela iziqondiso eziphuma emlonyeni wakhe, amazwi akhe uwabeke enhliziyweni yakho.

23 Aluba ubuya kuSomandla, uzavuselelwa; aluba ususa ububi bube kude lethente lakho

24 lomthuso wakho uwulahlele othulini, igolide lakho lase-Ofiri ulilahlele emadwaleni ezimbalwini,

25 lapho-ke uSomandla uzakuba ligolide lakho, lesiliva sekhethelo kuwe.

26 Ngempela uzazuza ukuthokoza kuSomandla uphakamisele ubuso bakho kuNkulunkulu.

27 Uzakhuleka kuye, yena akuzwe, ugcwalise izifungo zakho.

28 Lokho okumisileyo kuzakwenziwa, lokukhanya kuzazibaneka izindlela zakho.

29 Nxa abantu behlisiwe ubususithi, ‘Baphakamiseni!’ lapho-ke uzabasiza abahlulukelweyo.

30 Uzabasiza lalabo abonayo, abazakhululwa ngenxa yokuhlanzeka kwezandla zakho.”